1+1 >= 2

بسم الله الرحمن الرحيم

كالعادة كنت معتقد اني اقدر اكتب كل فترة حاجة وقلت لازم علي الاقل كل اسبوع اكتب حاجة جديدة , بس واضح ان الموضوع مش هييجي بالعافية ,يلا حصل خير.
النهاردة انا عايز احكي قصة من قصص الاطفال قصة مكررة وقديمة جداً جداً جداً جدااااااااااااااااااااااً وكلنا عارفنها كويس بس النظرية ان المفروض كل ما نسمع قصة مع الزمن الحاجات اللي نقدر نطلع منها هتختلف .
عارفين في برامج الاطفال لما بيقولوا للطفل في الأخر تقدر تقولنا استفدت ايه من القصة دي هو ده قصدي بالفرق اللي هيحصل المرة دي.
طيب ندخل في القصة بس من غير ضرب ولا شتيمة ولا تريقة
عارفين قصة السلحفة والارنب
ايوا الله ينور عليكوا بتاعت الارنب اللي كان بيسابق السلحفة وفي وسط الطريق اتغر ولقي نفسه هفته علي الاكل راح ضارب سندويتشين كبدة من عند عم عبده وبعدين لقي السلحفة معدية من جنبه قام كمل جري وبعدين لقي الكبدة كبسة علي نفسه قام مريح شوية المهم راح في النوم والسلحفة سبقته شفته التخلف ,طيب زمان بقي لما سمعنا القصة قلنا الدروس المستفادة ايه اولاً من وجهة نظر الارنب ان الغرور وحش يا ولاد اوعوا تتغروا , ومن وجهة نظر السلحفة ان الاصرار والعزيمة ............الكلام اللي مش جايب همه ده , طيب دلوقتي لما نسمع القصة دي بعد كل الخبرات الزفت اللي خدناها في حياتنا المفروض نستفيد ايه
مثلاً بالنسبة للارنب ان ميكلش من عند عم عبده عشان الكبدة بتاعته تقيلة وبتكبس علي المعدة او انه مثلاً لما ييجي ينام وهو في وسط سبق لازم يظبط منبه الموبيل عشان يلحق يصحي يكمل السباق , اما من وجهة نظر السلحفة فأنها لما تيجي تتسابق تتأكد انها مقلبة الموبيل بتاع الارنب عشان ميعرفش يظبط المنبه او انها تاخدها من قاصرها وتحطله منوم في الاكل .
طيب هو النظرية ان القصة دي حلوة وكل حاجة بس للأسف مش هي دي اللي عايز احكيها النهاردة
قصة النهاردة برضه بتحكي عن سلحفة وارنب بس دول كانوا كبار شوية
قال ايه كان في سلحفة وارنب اتحدوا بعض زي الاولانيين برضوا في سباق وفي وسط السباق برضه الارنب ضرب سندويتش الكبدة المتين وبعدين ريحله ربع ساعة وبعدين قام وكمل السباق وسبق السلحفة طبعاً عشان لا هو اهبل عشان يسيبها تسبقه ولا انتوا عبط عشان تصدقوا انها هتسبقه
المهم بعد ما السلحفة خسرت السبق ده قالت انها عايزة تسابق الارنب تاني قالها انتي محرمتيش قالتله لا محرمتش قالها طب علي ايه المرة دي قالتله علي سندويتشين كبدة من عم عبده قالها قشطة شغال طيب هنتسابق زي المرة اللي فاتت قالتله لأ المرة دي السبق اقصر احنا بس عايزين نعدي النحية التانية من النهر بييس يا معلم ؟ قشطة يا مان وخلاص اتفقوا علي السباق وفي يوم السباق الارنب طبعاً عشان ملوش في العوم كان مقرر انه هيلف لحد اول معدية عشان يعدي النيل بيها وبعدين يروح عند نقطة النهاية اما السلحفة فهي كانت مظبطة المكان ده مخصوص عشان بتعرف تعوم وزي مانتوا متخيلين السلحفة عامت وعدت النيل وعمك الارنب واقف في الطابور مستني المعدية وكل ما تيجي واحدة يلاقيها زحمة المهم انه خسر وكع تمن سندويتشين الكبدة
خلصت القصة علي كده ؟ لأ طبعاً الارنب والسلحفة عملوا اجتماع ودي وقالوا انهم عايزين يستفيدوا من خبراتهم في السباقات ويعملوا سباق تاني بس ضد حد جديد جابولك ايه يا سيدي جابوا الحمار عشان اهبل وعلي نياته قالولوا هيعملوا سباق معاه هما الاتنين والخسران هيعزم الاول والتاني عند ابو شقرة ( مش قلتلك حمار اهبل وعلي نياته ) قالهم طب نقضيها كبدة من عند عم عبده قام الارنب واخده علي جنب قاله يا عم خلي السلحفة تكع مهي كده كده خسرانة انت هتفرق معاك ايه المهم راحوا عشان يتسابقوا واول ما بدأ السبق الحمار لقي الارنب راح شايل السلحفة علي ظهره وجري بيها لحد موصلوا للنهر طبعاً علي ما حصلهم كانت السلحفة شالت الارنب علي ظهرها وبيعدوا النهر وطبعاً خسر الحمار السبق واتدبس في ابو شقرة
خلصت الحكاية طبعاً لو حكينا الحكاية دي للأطفال مش هيستفيدوا اي حاجة خالص اما بالنسبة للناس الكبار اللي خبراتهم في الحياة منيلة بستين نيلة زينا ممكن نقول اننا استفدنا حاجة واحدة بس المرة دي الكلام بجد اننا استفدنا ان 1+1>= 2 اه يا عم متصدمش جامد كده دي في بعض الاراء كمان 3 مش 2 بس كل اللي خدناه في الرياضة قبل كده كان غلط 1+1 مش بتساوي 2 عمرها ما تساوي 2 والدليل علي كده القصة دي
حد فهم حاجة
انا نفسي مش فاهم
ربنا يسهل والقاكم علي خير في اي حاجة تانية من اللي بكتبها
والسلام عليكم ورحمة الله وبركاته

خالد عادل ,
ابلة فضيلة

حتي لا تضيع عينه هدراً

بسم الله الرحمن الرحيم

للاسف انقطعت فترة عن الكتابة وهذا لاسباب عديدة بالتأكيد –لست اعلم اغلبها- ولعل هذا يشعرني بالأسي علي نفسي انني لم اعد اجد وقت كافي للفضفضة رغم انني اجد كل الوقت للعب الفيفا مثلا المهم

الموضوع النهاردة رخم شوية هتقولولي وايه الجديد اقلكم ان الموضوع بالاضافة لانه رخم هو موضوع كئيب جدا او علي الاقل اجده كذلك
بدأت القصة عندما عادت اختي من العمل يوم الاثنين لتتحدث معنا كالعادة عن كيف مر يومها في العمل ولمن لا يعلم فهي تعمل طبيبة امتياز بأحد مستشفيات القوات المسلحة
المهم عندما عادت يومها وكان عندها في اليوم ده نوبطجية -مبطشية- في قسم الرمد

كانت هناك واقعة أليمة اتت تحكي لنا عنها بالطبع تضمنت القصة العديد من المصطلحات الطبية المعقدة وسأحاول التغاضي عنها اما عن الواقعة فقبل خروج اختي من المستشفي بوقت قليل حوالي الساعة 8 مساء اتي للمستشفي حالة طارئة وهي لطفل في الرابعة من عمره يعاني من ثقب في القرنية بالطبع استغرقت اختي حوالي ساعة لتشرح لي الفرق بين القرنية والشبكية والحدقة والعدسة والبياض والنني و ..... ما علينا هذا الطفل كما تصف اختي سمعت انه اصيب بخرزة من مسدس اطفال في عينه وعندما سمعت ذلك اعتقدت انها مجرد اصابة سطحية خدش او شيء من هذا القبيل – طبعا هذا الخدش كان له مصطلح من 50 حرف انجليزي- ولكنها حينما بدأت فحص الطفل المصاب اكتشفت ان الامر اخطر من الخدش بكثير فكما وصفت انها حين رأت بعينها لم تصدق ما رأته وظلت ما يقرب من ال 10 دقائق تنظر في عين الطفل فبكل وضوح وامام عينها كان هناك ثقب كامل بالعين بحجم خرزت المسدس نعم ثقب بالمعني الحرفي للكلمة ثقب تسرب منه ماء القرنية وينذف منه دماً نتيجة اصابة الحدقة وهذا بعد مرور قرابة ال 7 ساعات علي اصابة الطفل اثناء تواجده بالحضانة
بعيداً عن اي تفاصيل اخري اكثر كأبة اتصلت اختي بالطبيب المشرف عليها لتأخذ رأيه وبدوره أتصل بالمشرف عليه ليبلغها ان عليها كتابة التقرير حول ما تراه في الحالة ثم تحويله علي مستشفي عسكري اخر للاطفال بعد وضع ضمادات علي عينه هذا بالطبع بعد عدم تصديق ودهشة من وصفها له للحالة وتم علي ذلك تحويل الطفل وانقطعت صلتها بالقصة
هذا عن القصة اما عن الملاحاظات فقد لاحظت اختي انه من الاستحالة ان تأتي مثل هذه الاصابة عن طريق خطأ بل ان اغلب الظن ان الطفل وقف بثبات وربما في رهان ما – غير مقدر للعواقب – في انتظار الضربة من صديق له من هذا االمسدس او ال baby gun
هذا عن ملاحظة اختي اما عن ملاحظتي الشخصية وبعيدا عن التاثر الذي تأثرته بالقصة ولكنني فكرت في الاسباب وراء هذا االحداث بالطبع هي اولا واخيراً ارادة الله وقدره سبحانه ولكنه امرنا ان نأخذ بالاسباب هل هذا قد كان بسبب اهمال من المشرفين بالحضانة ام ان الامر يتعدي ذلك انه اهمال من دولة بأكملها سمحت بأن تطغي تجارة دولة اخري عليها حتي تصل لدرجة سوق سلاح للأطفال مرخص وعلي ومرأي ومسمع منا وتذكرت حينها الاعلانات التي كنت اراها عن استخدام تداول الصواريخ النارية لخطورتها وتعجبت الا تستطيع دولة بأكملها منع استيراد صنف معين ام ان تلك الصواريخ والمسدسات تهرب ولو كان كذلك فيالها من مصيبة اوليس من الممكن لمن يهرب صورايخ للأطفال ان يهرب مخدرات او حتي اسلحة حقيقية
لن احاول الاسترسال اكثر في الافكار
ولندع الامر يسير ونحن معه ولكنها كانت لمحة فقط حتي لا تضيع عينه هدراً

للهزار وبس

انا لست قرداً

لقد كان لي موعداً مع القدر لكي أدخل بقدمي إلي عرين الأسد , هذا الموعد كان عقب إنتهائي من الثانوية العامة ولله الحمد ( علي السراء والضراء ) بمجموع يؤهلني لكية الحاسبات والمعلومات -والأدهي- بجامعة حلوان , بالطبع كان المجموع مؤهلاً لكليات الهندسة ولكنني -شوفوا الغباء- اقنعت أهلي بأنني ارغب في الألتحاق بكلية الحاسبات والمعلومات , ولكن كل شيء قسمة ونصيب .

فمنذ اللحظة الأولي وعند دخولك للكلية تشعر بأنك أنتقلت من عالم إلي أخر او انك بعد ان كنت تهنيء بمشاهدة مستشفي المجانين في الأفلام أتيحت لك الفرصة لتدخلها بقدمك, ولتنتقل من العالم الهنيء الذي تنعم فيه بنعمة العقل وبمهارة مخاطبة البشر للتحول إلي كائن هلامي لايعرف إلا التحدث عن الكمبيوتر والأدهي والأمر إلي الكمبيوتر , لتواجه المشكلة الرئيسية التي تصبح هدفك الأول في الحياة لتثبت للعالم وتقول لهم -انا لست قرداً-.

فمع اللحظات الأولي لتكوين المبرمج يبدأ الأهل والمحيطين في ملاحظة التغيرات التي تطرأ عليه من طول في المخالب ونعكشة في الشعر وحكة في الأذن هذا بالنسبة للأعراض الظاهرية البدنية , اما عن الاعراض الذهنية فحدث ولا حرج فمن حاللات الشرود واللاوعي إلي حالات المشي أثناء النوم إلي حالات تحريك الأصابع دو إرادة , كل هذه الأعراض تدعوا الاهل -معذورين- إلي الأعتقاد بأنك بدأت تتحول لمذئوب او ان دراكيولا شاف شغله معاك -ولعل هذا هو ما دعي أهلي لحبسي في الغرفة اغلب الليالي القمرية - اما عن موضوع القرود فلقد بدأت اشعر به لأول مرة حين اردت ان اخذ وقفة مع نفسي لأري ما هي نظرة المجتمع للمبرمج وحينها فقط استطعت ان اعرف ما هو شعور القرد في الجبلاية حين يقذفه المشاهدين باللب والسوداني فحتي مع اقرب الناس إلي -أسرتي - قد وجت انهم بالفعل قد وضعوني في خانة الكائنات مجهولة الهوية - ربما ايضاً هذا هو سبب اهتمامهم بنظريات فرويد للتطور اليومين دول-وبعد تلك الوقفة أتخذت القرار في ان اصرخ لأقول للعالم كله انا لست قرداً .

اما عن بعض الوقائع - الحقيقية- التي حدثت لي اثناء رحلة البحث عن الآدمية -وهي كثيرة- فقد كان من اشهرها واهمها واقعة انت بتكلم مين ياه وهي واضحة كما تري من اسمها ولعل اغلب المتعاملين مع الكمبيوتر قد حدثت لهم , ففي يوم من الايام طقت في دماغي اجرب برنامج speech recognation بتاع ال windows عادي يعني كنت فاضي ساعيتها وكان اهلي قد اعتادوا قبلها ان ممكن الكمبيوتر يخليك تكلم بني ادميين زي التليفون -ده كان اقرب حاجة اشبههالهم بيها- وقد اقتنعوا علي مضض ان هذا ممكن ولكن حين اردت ان اجرب هذا البرنامج كان الوضع مختلف فحينها وعندما اندمجت مع البرنامج كان معصلج شوية في ال word وكل ما اقله file يفتكرها find ويطلعلي ال search وبعد عناء وتعب ووسط الاندماج ده فوجئت بنفسي دون وعي بقول " File FIIIIILEEEEEEE مش find

يا غبي " وبعد ان انتهيت من الجملة بدأت افيق لأتلقي النتائج الوخيمة , فبعد ان انتهيت مباشرة وجدت اهلي كلهم تقريباً وقفين ورا قفايا وبيبوصوا في الشاشة يدورا انا بكلم مين - اصلهم بقوا بيعرفوا لما ابقي بكلم حد في ال MSN او ال SkyPe - المهم عرفوا طبعا اني مش بكلم بني آدم وطبعا مقدرتش اقولهم اني بكلم البرنامج ساعيتها كانوا لفوني في ملاية وعلي السراية الصفرا عدل المهم ساعيتها حاولت اتوه علي الموضوع واقنعهم اني استغرقت في الشغل بس فكنت بكلم نفسي -اهون من اني اكلم البرنامج طبعاً- وفيما بعد استطعت ان اشرح لأخي-المهندس المعماري- ما كان يحدث لأنه اكثرهم تفهما للموضوع وبعد حوار طويل اقتنع اخيراً اني ممكن ابقي لسعت شوية بس مش لدرجة السراية .

اما عن باقي الوقائع والحوادث للمبرمجين فلها رواية اخري ... وإلي اللقاء.

محدثكم من مصحة الامراض النفسية والعصبية بالعباسية ,

خالد الخللي .

ولا عزاء لقاطني الأدوار العليا

هذا هو الشعار الذي اتخذته حركة المياه المتمردة في غضون الايام الثلاثة السابقة , معلنةً حالة من العصيان والتمرد علي الحنفيات ,كما طالبت المياه بحق اللجوء السياسي للجراكن والبانيوهات ضمن حملتها للتنديد بمرفق المياه بالقاهرة , هذا واعلنت المياه اعتصاماً كاملاً عن النزول من اي حنفية من حنفيات قاطني العمارة بل وازداد الامر ليشمل المنطقة بأسرها .

كانت هذا الأحداث بعد ان تم الأعلان عن هذا الأعتصام صباح يوم لاأثنين لتبدأ بعدها بساعات قليلة حالة من الذعر والدمار سادت جميع غرف وانحاء الشقة , حيث خرج الاهل مزعورين محاولين انقاذ ما يمكن انقاذه من الموقف , هذا وقد تمكنت فرق الأنقاذ من ملء ما يقرب من 3 جراكن والبانيوا كاملاً قبل بدء الأعتصام بساعات قليلة , وغني عن الذكر ان هذا المخزون الأستراتيجي قد نفذ عن اخره قبل بداية اليوم الثاني من الأعتصام .

وفي ظل المفاوضات الدائمة والمستمرة مع مسئولي التمرد اعلنت المياه انصياعها لرغبات المفاوضين في العودة للحنفيات علي ان يتم هذا تحت عدد من الشروط التي فرضت علي الطرفين ,

أولاً :علي المواطنين الصبر لمدة تقارب اليوم حتي تبدأ المياه في العودة وهذا لظروف المواصلات .

ثانياً : علي المواطنين تحمل لون ورائحة المياه لمدة تقارب الاربع ساعات بدأً من موعد العودة المحدد في البند السابق حتي تهدأ حالتها النفسية.

ثالثاً: واستمراراً في حملتها اكدت المياه علي انه لا عزاء لقاطني الأدوار العليا (ربنا يكون في عوننا ) .

هذا وقد بدأت إجراءات العودة في ساعته وحينه

أما الأن وبعد ان هدأ الموقف نستطيع ان نقول بكل الثقة انه قد تم إرضاء كل من الطرفين , علي ان تستمر حالة من تطبيع العلاقات بينهم حتي يجد جديد في الموقف.

مراسلكم من داخل البلاعة ,

صرصور المصرصر .

والسلام عليكم ورحمة الله وبركاته