10/13/2007

بعد رمضان

بعد رمضان

وفي مكان ما من ارض الوطن الاسلامي

وقف مارد من مردة الشياطين يخاطب الشياطين الزغنين ويقلهم

الله الله الله

بقى هو ده اللي انا قلتلكم عليه

بقى اغيب شهر واحد –بمزاجي طبعاً- عشان كنت بصيف ف مارينا زي مانتوا عارفين

شيطان صغنن يهمس ف الشيطان اللي جانبه : قالك مارينا... يا عم روح دانتا بقالك شهر ف الحجز عمال بتاخد على قفاك

المارد: بتقول ايه ياد انت وهو اللي واقفين هناك

مش عايز اسمع نفس

مش كفاية المصيبة اللي انتوا فيها

بقى اغيب شهر ارجع الاقى اكتر من 99% من المسلمين بقوا بيصلوا كل الفروض!

وكمان الاقي ان في اكتر من 2 مليون بنت لبسوا الحجاب طول الشهر... لأ وكمان حجاب محترم!

وكمان حبايبنا الللي مكانوش بيطيقوا يشوفوا المسجد بقوا يصلوا هناك بالفرض والاتين كل يوم

وكله كوم والناس اللي بيصلوا التراويح دول كوم

ده انا سمعت كمان ان في ناس بيصلوا التهجد ... وناس اعتكفوا

بالزمة مش مكسوفين من نفسكوا

شيطان صغنن: والله يا باشا احنا كنا بنعمل اللي علينا ومبطلناش وسوسة طول الشهر

المارد: يا سلام .. وانت بتسمي لعب العيال اللي انت بتعمله ده وسوسة؟

الشيطان الصغنن: يعني هنعمل ايه اكتر من اننا نقلهم ان الحاجة الحرام حلوة روحوا اعملوها

المارد: يا سلام ! بالبساطة دي؟ وقال انا اللي فاكر اني سايب ورايا رجالة!

حاجة تسد النفس

السنة دي لازم تاخدوا دورات مكسفة

انا هوصي ابلة عفريتة تزودلكم حصص فنون الوسوسة ف المقررات

بس عامة انا كنت عامل حسابي على كده

كل شيء مدروس

ويا ريت تتعلموا مني اليومين دول وشوفوا المليطة اللي هتحصل ف العيد

دانا ورايا شغل كتير على ما انسي الناس دي كلها المسجد وارجع ازرع ف قلوبهم الاغاني والبنات.

وكل البنات دول لسة عايز اقنعهم تاني ان حرام عليهم يداروا الجمال الفظيع بتاعهم والشعر الحرير بلبس الحجاب وكمان الجيبات واللبس الواسع ده .. لازم اقنعها انهم كده مش هيعرفوا انها بنت اساساً

بس انا منزلهم السنة دي كام حاجة ف العيد يهبلوا

اقنعت الممثل بحلوق المبحلق انه يعمل ف الفيلم بتاعه رقصتين و4 بوسات وهينزله ف العيد عشان يساعد معايا

لأ وكمان اقنعت 3 دور عرض انهم يخفضوا تمن التذاكر عشان الاقبال يزيد شفت التكتيك يا هفئات ... مش يقلي نقنعه انه حلوة!... روح يا تافه , يا خسارة تربيتي فيكوا يا كلاب.

اه اما بالنسبة للأخوة القراء البني أدمين فأنا احب اوجهلم رسالة

اطمن يا ابني وانتخ على الآخر , الحياة مية مية وكله تمام

ولو شايف انك وحش عشان مبتصليش ف الجامع فاحمد ربنا انك بتصلي اساساً امال ايه يا ابني ده انت كده زي الفل..... بتقول ايه مش بتصلي كل الفروض اساساًَ., وماله برضه يا حبيبي مهو الجمعة للجمعة مكفرات وبعدين هو في حد بيتعاقب على حاجة معملهاش؟ لأ طبعاً , طيب يبقى ازاي هتتعاقب عشان مصليتش , شفت انك زي الفل اهوه!

ولو زعلان انك بتخرج كتير مع اصحابك ومقضينها هزار وضحك فانت تحمد ربنا ان اصحابك ولاد .. ايه بتقول كل اصحابك بنات؟ يا اخي وماله طالما ماشي معاهم محترم وبتعاملها زي اختك بالظبط .. مش انت بتبوس اختك برضه ؟ شفت بقى ان نيتك سليمة !

وانت يا عم ياللي بتشرب سجاير .. مش برضه ده احسن من انك تشرب حشيش ولا بانجوا؟ بتقول ايه , بتشرب حشيش؟ طيب وماله ما في ناس بتضرب ماكس وبتشم هروين وحتى دول كمان كويسين يا اخي اديك بتأذي نفسك بس مبتضرش حد غيرك!

اه واخوتنا البنات الحلوين مالك كده زعلانة عشان مش لابسة حجاب؟ يا ستي يعني هما اللي لابسين حجاب كانوا بيعملوا ايه عدل ولا هي مظاهر على الفاضي؟ بتقولي ايه كمان , لبسك ديق؟ وماله يا حبيبتي ديقي لبسك وافرحي مش احسن ما تمشي من غيره خالص ولا تنحرفي وترقصي؟ وبعيدن حتى الرقاصة مالها مهي بتكسب لقيمتها من تعبها مش احسن ما تشتغل شحاتة ولا تعيش عالة على المجتمع وبعدين دي بتعمل رواج سياحي وبتنعش الحركة الاقتصادية ف البلد!

شفتوا بقى يا حبيابي انكم كلكم حلوين وجمال وزي الفل ؟

مع السلامة واشوفكوا يوم القيامة

وابقوا قابلوني

8 comments:

ادم المصري said...

الف مبروك ياباشا ع النيو لوك الجديد
.
.
.
.
والشيطان بيقولك
بلاش نميمة لحسن شرق من كتر ما انت عمال تجيب في سيرته

أحمد عماد said...

مقال حلو قوي يا خالد

والحتة بتاعة ابقوا قابلوني في الأخر بتفكرني بتوصيف الموقف دا في القرآن

{وَقَالَ الشَّيْطَانُ لَمَّا قُضِيَ الأَمْرُ إِنَّ اللّهَ وَعَدَكُمْ وَعْدَ الْحَقِّ وَوَعَدتُّكُمْ فَأَخْلَفْتُكُمْ وَمَا كَانَ لِيَ عَلَيْكُم مِّن سُلْطَانٍ إِلاَّ أَن دَعَوْتُكُمْ فَاسْتَجَبْتُمْ لِي فَلاَ تَلُومُونِي وَلُومُواْ أَنفُسَكُم مَّا أَنَاْ بِمُصْرِخِكُمْ وَمَا أَنتُمْ بِمُصْرِخِيَّ إِنِّي كَفَرْتُ بِمَا أَشْرَكْتُمُونِ مِن قَبْلُ إِنَّ الظَّالِمِينَ لَهُمْ عَذَابٌ أَلِيمٌ }إبراهيم22

وحركة العيال التانية بتاعته
{كَمَثَلِ الشَّيْطَانِ إِذْ قَالَ لِلْإِنسَانِ اكْفُرْ فَلَمَّا كَفَرَ قَالَ إِنِّي بَرِيءٌ مِّنكَ إِنِّي أَخَافُ اللَّهَ رَبَّ الْعَالَمِينَ }الحشر16

ربنا يعصمنا من الشيطان يارب

Soooo said...

موضوع هايل قوي ياباشا بصراحه
واضح وصريح ومافيهوش لف ودوران

وكل سنه وانت طيب

وربنا يستر عاللي هيحصل في العيد



والسلام ختام

HOssam Sadik said...

الله ينور ياعم .. ايه الحلاوه ديه
كنا مفتقدين الافتكاسات الجامده ديه
حمد الله على السلامه

Ahmed Essawy said...

الله ينور يا كوكو
اسلوب رائع
بس فعلا الشيطان الحيوان دا شكلو عامل شغل جامد في العيد ...
انا لسه جاي من برة و شوفت العجب...
صعب يكون وسط الناس دي زويل ولا مجدي يعقوب ولا حاجه ...
دول ناس و الله عايزن بدل ما يخرجو يتفسحوا
يروحو مستشفي امراض عقليه .و نفسيه
بجد بجد انا مش متخيل ابو او ام الناس دي الي لبسهم عباره عن قصاصيص قماش ...
بزمتهم دا اب راجل ...ولا ام محترمه !!!!!

انا و الله النهارده كنت حولع ... كنت قاعد علي طاوله في مطعم و الدنيا زحمه ..فلقيت ام مفروض محترمه و لابسه عبايه ... فصعب عليا وقفتها وسط الناس روحت سايب الطاوله بتاعتي و نادتها علشان تقعد ... كنت فاكر انها زي امي ....
و لكن للاسف الشديد راحت مناديه علي واحده ... اكيد بنتها قدي او اكبر مني .... انا مش عارف هي عمله كدا في نفسها ازاي !!!!شبه البلاياتشو

بعيد عن اني ندمت اني سبت ليها الطاوله .. و استعجلت في اكلي ....
ايه التناقد الرهيب دا ...
ام زي دي لايمكن تكون عارفه هي لابسه الحجاب ليه ...
و بنت زي دي ...مخوخه و اكيد مخها فاضي و فاضي خالص ...
ابوها فين ... هي فين من نفسها ... هي اساسا مش صغيره علي الصح و الغلط ...
انا دمي اتحرق من كدا .

شقاوة شعب said...

بجد بوست جامد جدااااا
واسلوب كتابة اكثر من رااائع
جزاك الله خيرا وربنا يبارك فيك وفى مدونتك




شاركنى اغلى ممتلكاتى على مدونة شقاوة شعب

عاليا حليم said...

صدقنى شوشو ده مظلوم معانا احنا الى بنسمع كلامه

أشكرك على زيارتك اللطيفة لمدونتى

KhaledEssawy said...

ما شاء الله مقالة مية مية فكرة جديدة .. ربنا يبارك فيك يا خالد ويحفظك