10/07/2007

حاجات كتييير

بسم الله الرحمن الرحيم

بقالي كتييير جداً مكتبتش حاجة هنا
يمكن السبب ف كده اني - على عكس اغلب الناس - نادراً لما بستخدم البلوج عشان افرغ انفعلات او احكي عن موقف
بالنسبالي البلوج هي المكان لما بحس اني جتلي فكرة لحاجة جديدة او عايز اجرب حاجة معملتهاش قبل كده
وده لأني عارف ان ف اغلب الاحيان الناس مبيهمهاش تسمع حكاوي مملة
واي حد بيتكلم عن نفسه ف الغالب بيطلع ممل حتى لو محسش بكده
واقرب مثال على كده الكلام اللي بتقراه دلوقتي
كلام ممل , مش كده؟
بس الصراحة دي البلوج بتاعتي وحتى لو الكلام ممل فده شيء ميخصنيش لأني مضطر افرغ هنا انفعلاتي على غير عادة

رغم ان الفترة اللي فاتت كان فيها احداث كتييير جداً حصلتلي إلا اني معرفتش اكتب عنها حاجة خالص
يمكن من يوم ما اتخرجت مكتبتش حاجة
مكتبتش عن المقابلات اللي كنت بعملها عشان ادور على شغل
ومتكلمتش عن ازاي جالي الشغل فجأة واشتغلت فجأة
ومتكلمتش عن اني بقيت خال لبنوتة زي العسل اسمها رزان
يمكن كل اللي فات ده مكانش ضروري اتكلم عنه لأن كل ده مغيرش فيا حاجة
اشتغلت بس فضلت خالد عادل
بقيت خال بس لسة خالد عادل برضه
بس الحاجة اللي مينفعش افضل بعدها خالد عادل
هي وفاة والدي الله يرحمه
على الاقل بقيت خالد ابن المرحوم عادل سلامة
رغم ان لسة وقع الكلمة غريب عليا ولسة برضه مش متخيل تماماً الحقيقة
إلا ان ده غير فيا كتير
على الاقل جوايا حتى لو محدش شاف ده
اول ما بدأت اكتب بصراحة كان في دماغي اني هحكي شوية عن الموقف وازاي وامتى وليه
بس واضح اني مش هقدر
هكتفي بس بالنتائج رغم انها لما تتقال لوحدها مش هيبقى ليها نفس الاثر

النتيجة اني عرفت لأول مرة قد ايه انا كنت بحب والدي
وقد ايه انا كنت مقصر معاه
وندمت جداً على كل لحظة زعلته فيها او اعترضت عليه او حتى اتناقشت معاه وهو مكانش عايز يتناقش
ندمت على كل مرة مسمعتش فيها كلامه بسرعة
وعرفت ان برغم كل اللي انا كنت بعمله معاه ده عمره ما اتأخر عليا ف اي حاجة كنت بعوزها حتى لو بينلي غير كده
الكلام ده ممكن يبقى ملهوش فايدة دلوقتي بالنسبالي عشان مش هقدر اغير من الحقيقة حاجة
مقدرش دلوقتي غير اني اعوض ده ببر والدتي
والدعاء لوالدي الله يرحمه
وحاجة كمان
نفسي والله اوصي اي حد يقرى الكلام ده انه دلوقتي حالاً جري لو في حد من والديه موجود يروح جري يبوس ايديهم ورجلهم والله مش عيب والله مش مستاهلة كبر
ربنا يخليلكم اهلكم جميعاً بس محدش يضمن هو هيقدر يبر والده او والدته لحد امتى
احتمال ف مرة تانية ابقى احكي اللي حصل للعظة بس مش قادر دلوقتي

السلام عليكم

11 comments:

واحدة من الناس said...

السلام عليكم
ربنا يرحم والدك ويجعل مثواه الجنه ويرزقكم الصبر والسلوان ......ويرحم موتنا وموتى المسلمين ويرحمنا اذا صرنا الى ما صاروا اليه

معنديش تعليق على كلامك طبعا لاني انا حاسه بنفس الكلام بالظبط ومعرفتش قيمتهم غير لما فارقتهم

ادم المصري said...

خالد
انت حد حساس جدا
امال ايه يابني الرخماة اللي كانت فيك دي
.
.
انت حد طيب قوي
صدقني البوح بتاعك تلقائي جدا ومعبر جدا عن حالتك
.
.
انا اسف جدا لوالدك
انا لله وانا اليه راجعون
اللي خلف ما متش يا بطل
البركة فيك طبعا
.
.
انا كان نفسي اطمن عليك جدا
ياريت تراسلني علي الايميل عشان اعرف تليفونك

KhaledEssawy said...
This comment has been removed by the author.
KhaledEssawy said...

ربنا يرحم والدك ويجعل الجنة هى داره . كلامك مؤثر جدا فى موضوع العلاقات مع الاب والام يمكن انا حاسس بالشعور ده علشان اهلى بيغيبوا عنى ومش بشفهم غير 60 يوم فى السنة بس برده اللى راح ومبيرجعش غير اللى راح وجاى تانى . ربنا يديم عمر اهلى واهلك ياخالد ويحفظهم ونكون لهم ابناءبارين .. امين
على فكرة زى مانت بتقول انت مكنتش عارف قد ايه انت بتحب والدك .. برده انت متتخيلش هو برده بيحبكم قد ايه انا حسيت بحبه لكم اثناء حوار دار بينا لما قابلته فى الكلية.
تقدر تسأل على اهل والدك واصحابه وتودهم وتعامل وتغطى كل اوجه القصور اللى شعرت بها مع والدك لوالدتك وبكده برده تكون برده بتحسن الى والدك.
بس حاول تكمل وتكتب اللى عايز تقوله لآننا بجد محتاجين نقرأونعرف حاجة يمكن نتعظ و تغير سلوك واحد فينا فى تعامله مه اهله

osama said...

رحم الله والدك ...
وقل ربي ارحمهما كما ربياني صغيرا

وكلامك مليون صح ... وربنا يخليلك والدتك ويصبرك على ما انت فيه

Mohammad Nabil Al-Aggan said...

انا مش عارف اقول ايه بس انا عارف اللي انتا حاسه
عشان مريت بنفس الاحاسيس و الافكار ديه قبل كده


و قل رب ارحمهما كما ربياني صغيرا

Ramy Mahrous said...

البقاء لله يا خالد
بس انا عندي تعليق على حاجه يعني اه الي بيكتب على نفسه فالبلوج بيبقى ممل؟؟؟
انت كده بتغلط في عيسوي و حسام و نبيل او انا مسمحلكش
:D:D:D

khaled adel said...

@ all
البقاء والدوام لله وحده
وإنا لله وإنا إليه راجعون

khaled adel said...

@Ramy
لأ دول ناس بيكتوبا مقالات محترمة ومفيدة مش زي واحد عايز كل يوم يصدعنا بهو عمل ايه ,, احنا مالنا يا سيدي مش كل كوباية شاي هتشربها هتعملنا فيديو يورينا ازاي بتحط السكر :d
ناس مملة صحيح

أحمد عماد said...

جاء رجل إلى النبي صلى الله عليه وسلم فقال له هل بقي علي من بر والدي شيء أبرهما بعد وفاتهما قال نعم الصلاة عليهما والاستغفار لهما وإنفاذ عهدهما وإكرام صديقهما وصلة الرحم التي لا توصل إلا بهما

خلاصة الدرجة: حسن - المحدث: ابن العربي - المصدر: عارضة الأحوذي - الصفحة أو الرقم: 4/307

khaled adel said...

جزاك الله خيراً يا عماد وربنا يوفقنا إلى ما يحبه ويرضاه