قصيدة فيوتكس

القصيدة دي من تأليف احمد عماد وكاتبها بعد ما النتيجة طلعت عشان يهني ببيها الجروب
طبعاً هي فيها شوية فضايح بس ان شاء الله اتمني ان الناس مش هتفهم قوي

أفرح .. أفرح أنت وهو
أفرح يالا لمرة بقوة
قوم يا حسام أجري يا سعيد
نط يا عيسوي يالا بقوة

مدوا الضحكة بطول وبعرض
طيروا لفوق وابعدوا م الأرض
قوم يا جمال مش وقت ماسنجر
يالا يا خالد ..شد دا فرض

يالا يا حلم العمر الباسم
فرحة جديدة اهي بتتراسم
بعد تعبنا وطول ليالينا
ضحكة كبيرة سوا نتقاسم

بعد أربع سنوات في مشقة
سنة أشغال ودقايق رقة
خدنا خلاص إفراج يا جماعة
والأمر ماهوش ناقص زقة

أفرح يالا يا عيسوي قوام
شوف خدماتك وأنت تمام
بعد سنين فاتت في الرعب
اصرخ في الاناليزر نااااام

مش هتلاقي حد يزعق
أوعى تخاف أو أوعى تقلق
ولا هتنام تاني مخنوق
مربوط من رجليك متشعلق

ولا هنزعق سوا ولا حاجة
دي الدنيا خلاص مش محتاجة
ولا هتقوم تسألني خلاص
ولا هكتبلك ع التلاجة

سيبك من الاناليزر وأفرح
الكود في القلب مالوش مطرح
يالا يا عيسوي قوم وأتنطط
بس ما تبعدش قوي وتسرح

وأنت يا خالد هيص عيش
ما تطلسأش الفرحة بطيش
طلسا طلسأ كان في الكود
ويوم الفرحة كتير ما يجيش

اضحك يالا بدون رسومات
ولا داتا بيز ولا اي حاجات
ولا هتبات تعبان م الكود
يالا ارتاح من غير حسابات

ولا هتبات تقطع في طريق
كل مايوسع تاني يضيق
ولا هتنام تحلم بالكود
ولا راح تفطر بيه ع الريق

افتح ماتش هنلعب تاني
مش هنخبي خلاص ونعاني
ولا هيفتش حد علينا
نلعب ماتش في كل ثواني

يابني اتنطط اعمل زيطة
خبط مية مليون تخبيطة
افرح مرة بجد وقوة
ولا خلاص حبيت الحيطة

قوم يا حبيب القلب جمال
مابقاش فيها اي خيال
إحنا خلاص ايوة اتخرجنا
ودي حاجة مش محتاجة سؤال

اعمل شات من غير إزعاج
واضحك بقى بدماغ ومزاج
انتا خلاص حر وطليق
وأنت اساسا مش محتاج

أضحك دنيا ومتبسمة
عيش اللحظة المش مؤلمة
قولي الاول هل فرحان؟؟
أوعى ترد تقول ربما

انتا صحيح دلوقتي جمال
اب لاسرة ورب عيال
بس تناسى دا كله شوية
وافرح بقى من غير أهوال

ولا عربية هتفلت منك
ولا أكواد هتخيب ظنك
قول وأشجيني كلام وفتاوي
احكي كلام عني أو عنك

قوم يا حبيب الكل حسام
يالا يا ليدر كله تمام
أول مرة منذ كتير
مش هستأذن قبل ما أنام

فك ياليدر فرجت جامد
بعد ما عشت الايام صامد
يالا ارتاح من بعد جراح
أفرح متعمد أو عامد

ولا هتفتش تاني علينا
ولا هتراقب من حوالينا
مش هتراقب ع الي ينام
ولا تكتب في ورق أسامينا

أيامنا الفايتة وحنسيبها
والفرحة مين راح يناسبها
علشان كده فيوتكس اتفقت
عيناك ليدر يا حبيبها

أنت قائدنا في أي مكان
أنت كبيرنا في أي زمان
أنتا حبيبنا وحامي جروبنا
كلنا بنحبك يا حسام

طيب اقول إزاي لسعيد
افرح يالا ومد الايد
اصل موبايله مودع خالص
حد يشوفله جهاز وجديد

يالا هقولك وانت حبيبي
صاحب درب وشئ في نصيبي
افرح يالا الفرح أكيد
كل الفرح ماهوش تقريبي

بس أما أنتا سعيد أنا إيه
أنا فرحان فرحان كده ليه
قولوا لكل الكون يا جماعة
أنا اسعد بني آدم فيه

قوم يا سعيد صمم بالراحة
ارسم أحلامك مرتاحة
قول الي في قلبك ما تخافش
دي الضحكة بفرحات طراحة

أما لو هتكلم عني
كل كلامي هيبقى تمني
إني أشوفكم أحسن ناس
بس كفاية .. دموعي تخوني

أنا فرحان بيكم وعشانكم
فرحان بيا وقلبي مكانكم
بعد مافات أيام في عذاب
ربنا ريح بالي وبالكم

بعد الميشن والعربية
والأكواد الرايحة وجاية
والرسومات ع الشاشة والحيطة
والسبورة هتشهد ليا

نفسي اقول كلمة مغلوبة
اوعوا في أيامنا المسلوبة
تنسوا واحد منكم كان
طب مين يعملكوا مقلوبة ؟؟

أنا يا أصحابي في أخر القول
بيكم أنا فرحان على طول
إن كان جد ولا هزار
ولا خناقة في طبق الفول

أحلى جروب في حياتي بجد
فرحتي بيكم من غير حد
خالد .. عيسوي .. سعيد وجمال
وأنا وحسام والكون ممتد